Na fifti yia mama
De rakpala wit fiftin yia baba
Aw dεm kin tƆk am sεf
O lala
Na fifti tƆn fiftin dƆn fiftin tƆn fifti
Na yu-go-soba kƆntri
BƆt tide tide we dεm mεmba ram im ej
I mek lεk I dƆn soba
I bo siooo
Yu nƆ si we I was wit fufu wata
εn wεr im lεf fut afbak na im rayt fut
BƆt we I fifti so I mek lεk I chenj im stayl
I go insay kaka dεbul fƆ tek sεns twis mi an
εn kεr mi yon af pan wetin dεm dash wi
If ojukokoro nƆ day
Di nεks fiti yia go kam
εn mit wi nƆ tap fƆ tεtε
Pan bata okoto
A es mi ed εn opin mi yay
εn si se na di sem san we kƆmƆt
Di tεm we I bƆn
Na im kƆmƆt bak we I fifti so
Di sem tƆk we I tƆk bƆt wi mama wetman
Na im I tƆk igen tide
BƆt sƆntεm insεf go es im ed
εn si se
Di sem san we kƆmƆt da tεm we I bƆn
Na im kƆmƆt bak tide
Di wan we kik di bƆl
NƆ de fƆ si u kech am
Di wan we kech di bƆl
NƆ de fƆ si u kik am
LƆd o
Luk we mi lεf yay εn lεf yes
A no se wan de wan de
U kik o u kech o
Ɔl go brakεt na di kƆtin tri
A kamin o
Yεs o
Go tεl kƆzin se
Yεs o
Da kasada lif
Yεs o
DƆn go na im gƆngƆngƆn
I dƆn go na im gƆngƆngƆn
I dƆn go na im gƆngƆngƆn
LƆnta
LƆnta…o lƆnta
LƆnta
No comments:
Post a Comment
Dear Reader, You are encouraged to make your comments as objective as possible for the benefit of other readers.